Home / بالعاميةthoughts / و#حلها_ان_كان_فيك_تحلها

و#حلها_ان_كان_فيك_تحلها

شو راح تحس بس تفقد كل شي حدك؟!

أولا: بالنسبة للغة النص، النص بالعامية- نعتذر عن جميع الاخطاء الاملائية والقواعد – النص كُتب ونشر كما هو احساس الكاتب من دون اي مجاملات.

الحالة الاولى: تفقد ناس حتى لو بعدون موجودين وبتحكيون.

الحالة الثانية: تفقد ناس راحوا من زمان بعيد وما فيك تلومون.

الحالة الثالثة: او تفقد ناس رحلوا الى الدنيا التانية وخلص ما بقا راح تشوفون.

ب ٣ حالات انت بطلت تشوفون،

الحالة التالتة يمكن يطلع بالمنام شي مرة يقطع يسلم، يخبر، او تكون مفكر فيه كتير بليل ويظهر بالمنام أو رؤية، بس يلي اكيد منه اللقاء الصعب والحديث اصعب، بس بضل في كمية ذكريات كبيرة لو بتنقي كل يوم شوي راح ضَل تبتسم لان ذكرياته كتيرة وحلوين، وحتى بالرحيل خليك تبتسم من دمعة شوق بتزل بس ما بزعل، مع الوقت راح تترحم وتقرا الفاتحة وتدعيلو وتذكر انو كان دايما بحبك.

الحالة التانية مش راح تلتقو الا بالصدفة، ويمكن تعبس بوجه وما تلاقي محل لابتسامة صغيرة، يمكن ما تلتقى، تسمع عنه خبر، نفس الموضوع الابتسامة يلي سبق راح يكون عندك، واكتر يمكن بقلبك يدعي عليه، وما تخبر حدا، اذا طلعلك بالمنام اكيد متقل العشا قبل ما تنام، وراح تقول شفت كابوس مش منام، ومش بس هيك ذكريات الحلوة يلي معه اختفت وتبخرت حتى لو كانت كتيرة الذكرى البشعة الوحيدة هي يلي راح ضَل تجي ع راسك، راح تسبو انا مأكدة وتدعي عليه، خلينا نوقف هون بهيدي الحالة، لان واضحة وصريحة، ولا فيها لون رمادي ابدا، راح ينط لون الأسود من الكلمات.

واذا راح نلون الحالات، الحالة الثالثة هي بيضا متل شق اللفت، ناصعة البياض، حلوة مع الوقت خفيفة نضيفة، وضل ادعيله كان منيح وراح تضل ذكراه منيحة.

بينما الحالة الاولى، ويلّي هي بتفقد ناس بعدك عّم بتشوفون، بتبسم من قلبك وعبالك تعبس وتعبر عن حالة غضب من الوضع، ما فيك بتحبون، بتبسم وبتحكي كلام منيح، بتحس ما حدا سامعك غيرك انت، بتنقهر وبتقول ما بقا بدّي خبر، بيسبق القلب بس تشوفون وبيحكي وبترجع لنفس الإحساس مع هيدي الابتسامة يلي معلقة، لك روحي فضحتنيا، ما بدّي باقية محلي، بتقول طيب معلي كلها ابتسامة انفضحنا فيها حد نص المجتمع وناطر الباقي،

المشكلة مش هون يا اخي ابتسامة حلوة ما بتشكي من شي، يلي بتشتكي منه اكبر منها بكتير، ضحكة اختفت من زمان، وصوتها صار حزين اذا طلعت راح تطلع ناقصة، ضحكة صار محشورة بزمن بوقت ومكان معين، ممنوع تطلع عفوية وع ذوقك، لازم ضمن اطر محددة.

حتى لو طلعت وفلت بالغلط بالمكان والوقت الغلط الكل راح يقول مبسوط نيالك، يا اخي غلطنا وضحكنا تركنا مع هالضحكة ضروري تخليني غصة بأمها واندم أني ضحكت!

يا زلمي الوضع مش هون، هول الناس، يمكن يكون من عايلتك، من رفقاتك، او شي حبيب او حبيبة، روح لابعد زملاء العمل، أصدقائك، كل هالناس بتكن لهم مشاعر مختلفة، ما في حدا متل حدا، الا بنقطة انو مستفقدون كلون وهني موجودين وعم بتشوفون كل يوم.

هول الناس لونهم رمادي مش فاهم شي من شي وضعك تعيس، القصة اصعب لا بدك تتدعي عليهم، ومش عارف تسامحهم، ساعة ذكرى حلوة فجاة بتنط البشعة عليها، وكل دقيقة بقرار، هول ما بيطلعو بالمنام ولا كوابيس، لان اصلان ما بخلوك تنام، قاعدين معك، ع قلبك، ع راسك وين مكان قاعدين، والمشكلة مش هون، قاعدين واحلى من العسل.

و#حلها_ان_كان_فيك_تحلها

#إيناس_تميم

29/08/2018

9:55 am

Leave a Reply

%d bloggers like this: